کشمیر’دہشت گردی سے پاک’ خطہ بن رہا ہے: دلباغ سنگھ

سری نگر(یو این آئی) جموں وکشمیر پولیس سربراہ دلباغ سنگھ کا کہنا ہے کہ یونین ٹریٹری ‘دہشت گردی سے پاک’ خطہ بن رہا ہے اور اب منشیات کی بیخ کنی ہمارا اگلا چلینج ہوگا۔
انہوں نے کہا: ‘جموں و کشمیر میں دہشت گردوں کی تعداد بہت کم ہے اور دہشت گردی کے باقیات کو ختم کرنے کا کام بھی ہو رہا ہے۔ان کا کہنا تھا کہ جس طرح یونین ٹریٹری ‘دہشت گردی سے پاک’خطہ بن رہا ہے اسی طرح اس کو منشیات سے پاک خطہ بھی بنایا جائے گا۔موصوف پولیس سربراہ نے ان باتوں کا اظہار ہفتے کو شمالی کشمیر کے قصبہ سوپور میں ڈی پی ایل پر منعقدہ ایک تقریب کے حاشیے پر نامہ نگاروں کے سوالوں کے جواب دینے کے دوران کیا۔
انہوں نے کہا: ‘ہمیں فخر ہے کہ یونین ٹریٹری دہشت گردی سے پاک خطہ بن رہا ہے دہشت گردوں کی تعداد بہت کم ہے اور دہشت گردی کے باقیات جو ختم کرنے کے لئے بھی کام ہو رہا ہے’۔ان کا کہنا تھا: ‘اب ہمارا اگلا چلینج منشیات کی وبا کا خاتمہ ہے اور جس طرح یوٹی کو دہشت گردی سے پاک خطہ بنایا جا رہا ہے اسی طرح اس کو منشیات سے پاک بھی بنا یا جائے گا’۔
مسٹر سنگھ نے کہا کہ سوپور ایک زمانے میں ملی ٹنسی کا مرکز تھا لیکن آج یہاں ہر طرف تجارتی سرگرمیاں عروج پر ہیں۔بارہمولہ میں سکھ برادری سے وابستہ ایک عمر رسیدہ شخص کی لاش بر آمد ہونے کے بارے میں پوچھے جانے پر ان کا کہنا تھا کہ ایسے واقعات عمومی نوعیت کے ہیں’۔انہوں نے کہا کہ پولیس نے اس سلسلے میں مقدمہ درج کیا ہے اور تحقیقات شروع کی گئی ہیں۔ان کا کہنا تھا کہ اس کیس کو کرائم برانچ کے سپرد کیا گیا ہے۔پنچایتی انتخابات کی تیاریوں کے بارے میں پوچھے گئے ایک سوال کے جواب میں پولیس سربراہ نے کہا کہ اس ضمن میں تمام انتظامات کئے گئے ہیں۔انہوں نے کہا کہ پولیس ان انتخابات کے پر امن اور ہموار انعقاد کو یقینی بنائے گی۔