سلطان پور کے موجودہ ایم پی کے انتخاب کو چیلنج مینکا کی عرضی خارج

لکھنؤ:14اگست(یواین آئی) الہ آباد ہائی کورٹ کی لکھنؤ بنچ نے بی جے پی کی سینئر لیڈر مینکا گاندھی کی اس انتخابی عرضی کا خارج کردیا ہے جس میں انہوں نے سلطان پور کے موجودہ ایم پی رام بھوال نشاد کے انتخاب کو چیلنج کیا تھا۔
محترمہ گاندھی کی عرضی کو وقت مقررہ کی خلاف ورزی اور پبلک ریپرزنٹیشن ایکٹ۔1951 کی دفعات 81اور86 کی بنیاد پر خارج کیا گیا ہے۔
الیکشن عرضی خاص طور سے رام بھوال نشاد کا ذکر کرتے ہوئے دائر کی گئی تھی جس میں کہا گیا تھا کہ منتخب سماج وادی پارٹی(ایس پی) امیدوا پر 12 مجرمانہ مقدمے درج ہیں۔ جبکہ الیکشن کی کاروائی کے آغاز کے دوران فارم 26 داخل کرتے وقت مدعا علیہ نے آٹھ کا انکشاف کیا تھا۔
عرضی میں یہ بھی الزام لگایا گیا تھا کہ مجرمانہ بیک گراونڈ کوجان بوجھ کر نہ بتانا کرپٹ عمل ہے اور اس طرح یہ پوری طرح سے پبلک ریپرزنٹیشن ایکٹ۔1951 کی دفعہ100 کے تحت آتا ہے۔ عرضی میں یہ بھی درخواست کی گی ہے کہ اس بنیاد پر سلطان پور لوک سبھا سیٹ کا الیکشن منسوخ کیا جاسکتا ہے۔