آئزول، 6 جون (یو این آئی) میزورم پولیس نے جمعرات کو میزورم-میانمار سرحد چمفائی سے 5.57 کروڑ روپے کی ہیروئن برآمد کی اور ہندوستان-میانمار سرحدی تجارتی مرکز زوکھاوتھر گاؤں کے ایک 42 سالہ باشندے کو اسمگلنگ اور ممنوعہ اشیاء رکھنے کے الزام میں گرفتار کیا۔
چمفائی کے مغربی مضافات میں خانکاون میں چلباویہ جنکشن پولیس چیک گیٹ پر تعینات ریاستی پولیس کے اہلکاروں نے تفتیش کے دوران ایک کار سے 156 صابن کے ڈبوں میں چھپائی گئی 1.902 کلوگرام ہیروئن ضبط کرلیا۔ اس کے علاوہ گاڑی کے ڈرائیور زوکھاوتھر ساکن للنون پویا (42) کو گرفتار کیا گیا۔
پولیس یہ جاننے کے لیے چھان بین کر رہی ہے کہ آیا للنون پویا پکڑی گئی ہیروئن کا مالک ہے یا میانمار سے منشیات کی اسمگلنگ کا محض اس کا پیشہ ہے۔
چمفائی پولیس اسٹیشن میں نارکوٹک ڈرگس اینڈ سائیکوٹرپک ایکٹ 1985 کی متعلقہ سیکشن کے تحت مقدمہ درج کیا گیا تھا اور مشتبہ شخص کو چمفائی ضلع میں خصوصی عدالت (این ڈی اینڈ پی ایس ایکٹ) کے سامنے پیش کیا گیا تھا۔
دریں اثنا، ریاستی ایکسائز اینڈ نارکوٹکس ڈپارٹمنٹ کے اہلکاروں نے بدھ کو آئزول شہر کے تین علاقوں سے 985 گرام ہیروئن ضبط کی۔ ایکسائز اینڈ نارکوٹکس ڈپارٹمنٹ کے ترجمان پیٹر جوہمنگتھانگا نے جمعرات کو کہا کہ آئزول سے تین افراد – لالبواتسائی (35)، لالموانسانگا (23) اور لالسانگلیانا (43) – کو منشیات رکھنے کے الزام میں گرفتار کیا گیا ہے۔
تینوں ملزمان کے خلاف این ڈی پی ایس ایکٹ 1985 کے تحت مقدمہ درج کیا گیا اور انہیں جمعرات کو خصوصی جج (این ڈی پی ایس ایکٹ) کی عدالت میں پیش کیا گیا۔
