ناسک: لگژری بس میں آگ لگی،11اموات

ناسک( ہندوستان ایکسپریس ویب ڈیسک): مہاراشٹر کے ناسک میں ہفتہ کے روز صبح کی اولین ساعتوں میں مسافروں سے بھری لگژری بس میں آگ لگنے سے کم از کم 11 افراد ہلاک ہو گئے۔ مہلوکین میں ایک بچہ بھی شامل ہے۔ اس کے علاوہ اس حادثے میں 38 دیگر مسافر جھلس گئے ہیں۔ تمام زخمیوں کو علاج کے لیے سول اسپتال میں داخل کرایا گیا ہے۔
یہ حادثہ اورنگ آباد روڈ پر ناسک کے ناندور ناکا مرچی ہوٹل کے قریب صبح 5 بجے کے قریب پیش آیا۔ خبر رساں ایجنسی پی ٹی آئی کے مطابق ٹرک سے زوردار ٹکر ہونے کی وجہ سے بس میں آگ لگی۔ بس یاوتمال سے ممبئی جا رہی تھی، جبکہ ٹرک ناسک سے پونے جا رہا تھا۔
واقعہ کی اطلاع ملتے ہی پولیس اہلکار موقع پر پہنچ گئے اور امدادی کام شروع کر دیا۔ حادثے کی ویڈیو میں واضح طور پر دیکھا جا سکتا ہے کہ مسافر بس آگ کے شعلوں میں گھری ہوئی ہے اور دھو دھو کر چل رہی ہے۔
ناسک کے ڈپٹی کمشنر آف پولیس امول تانبے نے کہا کہ مرنے والوں میں زیادہ تر بس کے سلیپر کوچ کے مسافر تھے۔ زخمیوں کو علاج کے لیے اسپتال لے جایا گیا ہے۔ مقدمہ درج کر لیا گیا ہے اور آگ لگنے کی اصل وجہ جاننے کے لیے تفتیش کی جا رہی ہے۔‘‘
عینی شاہدین کا کہنا ہے کہ حادثہ صبح 5.15 بجے کے قریب پیش آیا جس کے بعد انہوں نے پولیس اور ایمبولینس کو بلایا۔ وہیں، وزیر اعظم نریندر مودی نے حادثے پر غم کا اظہار کیا ہے اور حادثے میں ہلاک ہونے والوں کے لواحقین کے لئے دو دو لاکھ روپے کی مالی امداد کا اعلان کیا، حادثے میں زخمی ہونے والوں کے لئے 50000 روپے دینے کا اعلان کیا گیا ہے۔
وزیر اعلیٰ ایکناتھ شندے نے بھی حادثے میں ہلاک ہونے والوں کے لواحقین کو 5-5 لاکھ روپے معاوضہ دینے کا اعلان کیا ہے۔ ریاستی وزیر دادا بھوسے نے کہا کہ مہاراشٹر حکومت زخمیوں کے علاج کا خرچ برداشت کرے گی۔