نئی دہلی/ شملہ، 04 اکتوبر ( یواین آئی ) ہماچل پردیش میں بیت الخلا پر ٹیکس لگانے کے تنازعہ کو بے بنیاد قرار دیتے ہوئے وزیر اعلیٰ ٹھاکر سکھویندر سنگھ سکھو نے وضاحت کی ہے کہ ریاستی حکومت کے پاس ایسا کوئی منصوبہ نہیں ہے۔مسٹر سکھو نے یہاں نامہ نگاروں سے کہا کہ ہماچل میں ‘ٹوائلٹ ٹیکس’ لگانے کے دعوے بے بنیاد ہیں اور ریاستی حکومت میں ایسی کوئی تجویز نہیں ہے۔ انہوں نے کہا کہ سیاسی فائدے کے لیے ایسے بیہودہ اور بے بنیاد بیانات دئیے جا رہے ہیں جن سے گریز کیا جانا چاہیے۔
وزیر اعلیٰ نے کہا کہ ہریانہ میں اسمبلی انتخابات کے پیش نظر بی جے پی مذہب کے نام پر سیاست کر رہی ہے۔ ان سے فائدہ اٹھانے کے لیے ایسے معاملات پر سیاست نہیں کی جانی چاہیے، خاص طور پر جب الزامات حقیقت سے دور ہوں۔
انہوں نے الزام لگایا کہ بی جے پی نے اسمبلی انتخابات میں جیت کو یقینی بنانے کے لیے 5000 کروڑ روپے کی ریوڑیاں تقسیم کیں جس میں مفت پانی کا اعلان بھی شامل ہے، لیکن اس کے دلکش نعروں کا شکار ہونے کے بجائے ریاست کے عوام نے کانگریس کو ایک مضبوط حکومت دی۔
