وزیر اعظم کا روسی صدر کو ٹیلی فون

نئی دہلی، 20 مارچ (یو این آئی) وزیر اعظم نریندر مودی نے آج رشیئن فیڈریشن کے صدر ولادیمیر پوتن کے ساتھ ٹیلی فون پر بات چیت کی وزیراعظم نے انہیں روسی فیڈریشن کا دوبارہ صدر منتخب ہونے پر مبارکباد پیش کی اور روس کے دوست عوام کی امن، ترقی اور خوشحالی کے لیے نیک خواہشات کا اظہار کیا دونوں رہنماؤں نے آنے والے برسوں میں دونوں ممالک کے درمیان خصوصی اور مراعات یافتہ اسٹریٹجک پارٹنرشپ کو مزید مضبوط بنانے کے لیے ٹھوس کوششیں کرنے پر اتفاق کیا۔
دونوں رہنماوں نے دوطرفہ تعاون کے مختلف امور میں پیش رفت کا بھی جائزہ لیا اور باہمی دلچسپی کے علاقائی اور عالمی امور پر تبادلہ خیال کیا۔روس-یوکرین تنازعہ پر تبادلہ خیال کرتے ہوئے وزیر اعظم مودی نے آگے بڑھنے کے راستے کے طور پر بات چیت اور سفارت کاری کے حق میں ہندوستان کے مستقل موقف کا اعادہ کیا۔دونوں رہنماؤں نے رابطے میں رہنے پر اتفاق کیا۔
خاص بات یہ بھی ہے کہ وزیر اعظم نریندر مودی نے آج یوکرین کے صدر ولادیمیر زیلنسکی کے ساتھ بھی ٹیلی فون پر بات کی۔دونوں رہنماؤں نے، مختلف شعبوں میں ہندوستان-یوکرین شراکت داری کو مزید مضبوط کرنے کے طریقوں پر تبادلہ خیال کیا۔
وزیر اعظم نے روس-یوکرین تنازعہ پر تبادلہ خیال کرتے ہوئے ہندوستان کے عوام پر مبنی نقطہ نظر کا اعادہ کیا اورپیشرفت کرنے کے لیے بات چیت اور سفارت کاری پر زور دیا۔
انہوں نے روشنی ڈالی کہ ہندوستان، فریقین کے درمیان تمام مسائل کے جلد اور پرامن حل کے لیے تمام کوششوں کی حمایت کرتا ہے۔ انہوں نے مزید کہا کہ ہندوستان پرامن حل کی حمایت کے لیے ہر ممکن کوشش جاری رکھے گا۔صدر زیلنسکی نے یوکرین کے لوگوں کے لیے ہندوستان کی مسلسل انسانی بنیاد پر امداد کی تعریف کی۔دونوں رہنماؤں نے رابطے میں رہنے سے اتفاق کیا۔