نئی دہلی،یکم اکتوبر (یو این آئی) پروفیسرنجمہ رحمانی کی مدت صدارت کی تکمیل کے بعدآج پروفیسرابوبکرعبادنے صدرشعبہ اردو،دہلی یونیورسٹی کاعہدہ سنبھال لیاہے ۔آج یہاں جاری ایک ریلیز کے مطابق ایک مخصوص تقریب میں پروفیسر نجمہ رحمانی نے پروفیسر ابوبکر عباد کو عہدے کاچارج دیا اورگلدستہ پیش کرکے بحیثیت صدران کااستقبال کیا اس موقع پرشعبے کے اساتذہ پروفیسر ارجمند آرا، پروفیسر محمد کاظم، پروفیسر مشتاق عالم قادری،پروفیسر متھن کمار،ڈاکٹرارشاد نیازی، ڈاکٹراحمدامتیاز، ڈاکٹر شاذیہ عمیر،ڈاکٹرعلی احمدادریسی، ڈاکٹرناصرہ سلطانہ، ڈاکٹر زاہد ندیم احسن،ڈاکٹرفرحت کمال نے نئے صدرشعبہ کومبارک بادپیش کی اورخوش آمدیدکہا۔
خیال رہے کہ پروفیسرابوبکرعبادکاتعلق علمی وادبی خاندان سے ہے۔ان کے والدمفتی محمدظفیرالدین مرحوم مجاہدآزادی کے ساتھ دارالعلوم دیوبندکے مفتی اعظم،مسلم پرسنل لابورڈکے بانی رکن اوراسلامک فقہ اکیڈمی کے صدرتھے اورتقریباسترکتابوں اورڈھائی سومضامین کے مصنف ہیں۔ پروفیسر ابوبکر عباد کی شہرت ایک سنجیدہ ناقدو ادیب،شاعروافسانہ نگار کی ہے۔ان کی متعددکتابیں شہرت ومقبولیت حاصل کرچکی ہیں۔ان کی دینی تعلیم دارالعلوم دیوبنداورعصری تعلیم علی گڑھ مسلم یونیورسٹی سے حاصل کی۔پروفیسرقاضی افضال حسین کی نگرانی میں ایم فل اورپی ایچ ڈی کی اسناد حاصل کرنے کے بعدڈیڑھ سال تک شعبہ اردو،علی گڑھ مسلم یونیورسٹی میں استاذکی حیثیت سے خدمات انجام دیں۔
قومی کونسل برائے فروغ اردوزبان میں پرنسپل پبلی کیشن آفیسرکے عہدے پرفائزرہے اوراب شعبہ اردو،دہلی یونیورسٹی میں پروفیسرہیں۔ فکشن تنقیدکے حوالے سے ان کی تین کتابیں: ممتاز شیزیں:ناقدکہانی کار،فکشن کی تلاش میں اورتقلیدسے پرے خاصی اہمیت کی حامل ہیں۔شاعری کی تنقیدسے متعلق ان کی کتاب کانام:تنقیدسے پرے ہے۔خواجہ الطاف حسین حالی کی حیات اوران کے کارناموں پرمشتمل تحقیقی کتاب الطاف حسین حالی ہے اورنظموں کامجموعہ نظمانے۔ان کی کتابوں کو دہلی اردواکادمی،اترپردیش اردواکادمی،بہاراردواکیڈمی اورمغربی بنگال اردواکیڈمی نے اعزازات وانعامات سے نوازاہے۔ملک اوربیرون ملک کے معتبررسائل وجرائدمیں دو سوسے زائدمضامین،ڈیڑھ درجن افسانے اورتقریباپچاس نظمیں شائع ہوچکی ہیں۔فکشن اورفکشن کی تنقیدان کامخصوص میدان ہے۔انھیں پروفیسرابوالکلام قاسمی، پروفیسر شہریار، پروفیسرنورالحسن نقوی،پروفیسرمنظرعباس اورپروفیسرعتیق احمدصدیقی جیسے گراں قدراساتذہ سے شرف تلمذحاصل ہے۔پروفیسرابوبکرعبادکی شناخت ادب کے نئے لکھنے والوں کوانگیزوراغب کرنے کے لیے بھی طلباوطالبات میں شہرت ہے۔شعبے کے تمام طلباوطالبات نے بھی صدرشعبہ کی خدمت میں ہدیہ تبریک پیش کی۔
