راجناتھ دفاعی مینوفیکچرنگ میں معیار پر زور دیا

نئی دہلی، 28 نومبر (یواین آئی) وزیر دفاع راج ناتھ سنگھ نے ہندوستانی دفاعی صنعت کاروں سے دفاعی پیداوار میں معیار پر زور دینے کا مطالبہ کرتے ہوئے بین الاقوامی مارکیٹ میں مسابقت کے لیے مصنوعات کے معیار کو اولین شرط قرار دیا ہے۔
بدھ کو یہاں دفاعی مصنوعات میں خود کفالت کے لیے ‘کوالٹی اوڈیسی’ کے موضوع پر ڈیفنس ریسرچ اینڈ ڈیولپمنٹ آرگنائزیشن (ڈی آر ڈی او) کی کوالٹی کانفرنس کے اجلاس سے خطاب کرتے ہوئے مسٹر سنگھ نے کہا کہ صرف معیاری مصنوعات کی عالمی مانگ ہے اور اس سے مدد ملے گی۔ ہمیں ہندوستان کو عالمی مینوفیکچرنگ ہب اور ایک حقیقی دفاعی برآمد کنندہ بنانے کے وزیر اعظم کے وژن کو پورا کرنا ہے۔
وزیر دفاع نے کہا کہ جو ممالک معیاری مصنوعات تیار کرتے ہیں وہ اپنے آلات دنیا بھر کے ممالک کو برآمد کرتے ہیں۔ انہوں نے کہا کہ ان پلیٹ فارمز کی قیمتیں ان کے اچھے معیار کی وجہ سے کافی زیادہ ہیں تاہم یہ بات بھی ذہن میں رکھنی چاہیے کہ درآمد کرنے والے ممالک بھی جدید ترین مصنوعات کے لیے سب سے زیادہ قیمتیں ادا کرنے کے لیے تیار ہیں۔
مسٹر سنگھ نے زور دے کر کہا کہ اعلیٰ معیار کی مصنوعات گھریلو دفاعی صنعت کے لیے اعتبار پیدا کرتی ہیں اور بین الاقوامی منڈی میں ہندوستان کی ساکھ کو بڑھاتی ہیں۔ انہوں نے معیاری دفاعی مصنوعات کی تیاری میں لاگت پر قابو پانے کی اہمیت پر بھی زور دیا۔وزیر دفاع نے کہاکہ ”لاگت کنٹرول کو انتہائی اہمیت دی جانی چاہیے۔ تاہم یہ معیار کی قیمت پر نہیں ہونا چاہئے۔ ہمیں قیمت پر عالمی سطح پر مقابلہ کرنا ہے لیکن یہ اعلیٰ معیار کے زمرے میں رہ کر کرنا ہے۔ ہمیں اس خیال کے ساتھ آگے بڑھنا چاہیے۔‘‘
انہوں نے اعلیٰ معیار کے فوجی نظام بنانے کی ضرورت پر زور دیا جو موثر، قابل بھروسہ اور محفوظ ہوں اور مسلح افواج کو کامیابی کے ساتھ مشن کی تکمیل کے قابل بنا سکیں۔