عازمین کیلئے جاری تربیت کے دوران چیئرپرسن کوثر جہاں نے میڈیا سے خطاب کیا
نئی دہلی(پریس ریلیز):دہلی اسٹیٹ حج کمیٹی کی جانب سے گذشتہ ایک مئی سے شروع نوروزہ حج تربیتی پروگرام کے دوسرے دن آج جنوبی دہلی علاقہ کے تقریبا200عازمین کو حج سے متعلق امور اور ارکان و مسائل کے علاوہ دوران حج مدینہ منورہ اور مکہ مکرمہ میں عازمین حج کو درپیش مشکلات اور معاملات پر تربیت دی گئی۔ اس موقع پر آج کے تربیتی اجلاس میں دہلی سے حج بیت اللہ کے لیے روانہ ہونے والی 40بغیر محرم خواتین کو بھی خصوصی طور پر ایک ساتھ مدعو کیا گیا۔ دہلی اسٹیٹ حج کمیٹی کی چیئرپرسن محترمہ کوثر جہاں،ممبر و کونسلر محترمہ نازیہ دانش، ایگزیکٹو آفیسر جناب اشفاق احمد عارفی، ڈپٹی ایگزیکٹو آفیسرجناب محسن علی ، دسٹرکٹ ٹرینرخلیق احمد، مفتی شیم احمد قاسمی اورخاتون عالمہ محترمہ صبیحہ صالحاتی صاحبہ نے عازمین حج سے خطاب کیا۔
آج کے تربیتی اجلاس میں دہلی اسٹیٹ حج کمیٹی کی چیئرپرسن محترمہ کوثر جہاں نے بغیر محترم خواتین عازمین حج سے خصوصی طور پر روبرو ہوئیں اور انہیں مبارکباد اور صحت و سلامتی کے ساتھ فریضہ حج کی ادائیگی کے بعد وطن واپسی کے لیے نیک تمنائوں کا اظہار کیا۔ اس موقع پر چیئرپرسن محترمہ کوثر جہاں نے پرنٹ اور ایلکٹرانک میڈیا سے روبرو ہوتے ہوئے بتایا کہ اس سال دہلی سے 40خواتین بغیر محرم کے حج بیت اللہ کے لیے روانہ ہو رہی ہیں جو گذشتہ برسوں میں سب سے زیادہ تعداد ہیں۔انہوں نے ان خواتین عازمین حج سے یقین دہانی کرائی کہ وہ اپنی جانب سے ہر ممکن کوشش کریں گی کہ انہیں دوران حج کسی طرح کی دقت و پریشانی کا سامنا نہ کرنا پڑیں۔
