باری پاڑا/ ریمونا/ کیندرپارا (اڈیشہ)، 29 مئی (یو این آئی) وزیر اعظم نریندر مودی نے بدھ کو کہا کہ اڈیشہ میں کانگریس اور بیجو جنتا دل (بی جے ڈی) کے دور حکومت میں ہونے والے بدعنوانی کے تمام معاملات کی جانچ کی جائے گی اور ریاست کو لوٹنے والوں کو سزا دی جائے گی اور انہیں انصاف کے کٹہرے میں لایا جائے گا، یہ ہے ‘مودی کی گارنٹی’۔
مسٹر مودی نے اڈیشہ میں اپنی انتخابی مہم کے چوتھے مرحلے کے دوران انتخابی ریلیوں سے خطاب کرتے ہوئے کانگریس اور بی جے ڈی دونوں حکومتوں پر ریاست میں غربت کے لیے ذمہ دار ہونے کا الزام لگایا۔ انہوں نے کہا کہ کانگریس نے اوڈیشہ پر 50 سال حکومت کی، جبکہ بی جے ڈی نے گزشتہ 25 سالوں سے ریاست پر حکومت کی ہے۔ انہوں نے دونوں پارٹیوں پر اڈیشہ کے لوگوں کو ترقی کے نام پر دھوکہ دینے کا الزام لگایا۔
وزیر اعظم نے کہا کہ اڈیشہ معدنیات اور دیگر وسائل سے مالا مال ہونے کے باوجود ریاست نے مطلوبہ اقتصادی ترقی نہیں دیکھی ہے اور لوگ اب بھی غربت کی زندگی گزار رہے ہیں۔انہوں نے عہد کیا کہ بدعنوانی، ریاست کو لوٹنے اور اڈیشہ کے لوگوں کی امنگوں کو چکنا چور کرنے والوں کو بخشا نہیں جائے گا اور انہیں جیل بھیجا جائے گا۔
مسٹر مودی نے کہا کہ بی جے ڈی لیڈر جن کے پاس پہلے سائیکل بھی نہیں تھی، اب لگژری کاریں ہیں اور انہوں نے بدعنوانی کے ذریعے بہت پیسہ اکٹھا کیا ہے۔ انہوں نے وعدہ کیا کہ ان سے لوٹی گئی رقم واپس لی جائے گی۔ وزیر اعظم نے لوگوں سے لوک سبھا اور اسمبلی دونوں انتخابات میں بی جے پی کے امیدواروں کو ووٹ دینے کی اپیل کی اور ریاست میں ‘ڈبل انجن’ حکومت کی تشکیل کی وکالت کی۔ انہوں نے یقین دلایا کہ اس کے ساتھ ہی اڈیشہ ملک کی نمبر ایک ریاست بن جائے گی۔
وزیراعظم نے کہاکہ 10 سال پہلے لوگ سمجھتے تھے کہ کرپشن اور دہشت گردی پر قابو پانا مشکل ہو جائے گا لیکن گزشتہ 10 سالوں میں ملک ان مسائل سے آزاد ہو گیا ہے۔انہوں نے کہا کہ جموں و کشمیر کے لوگ اب ریکارڈ ووٹنگ کے ساتھ جمہوریت کا جشن منا رہے ہیں۔ 2014 سے پہلے ہندوستان عالمی معیشت میں 11ویں نمبر پر تھا اور آج پانچویں نمبر پر پہنچ گیا ہے۔
