پیٹرولنگ اور سرچ آپریشن جاری، کئی مشکوک افراد گرفتار
جموں (یو این آئی) ایس ایس پی راجوری محمد اسلم نے جمعے کے روز کہاکہ ڈانگری راجوری حملے میں ملوث ملی ٹینٹوں کی بڑے پیمانے پر تلاش جاری ہے۔انہوں نے کہاکہ ضلع بھر میں مشکوک افراد کی گرفتاریوں کا سلسلہ شروع کیا گیا اور بہت جلد حملہ آور وں کو کیفر کردار تک پہنچایا جائے گا۔ان باتوں کا اظہار موصوف نے نامہ نگاروں سے بات چیت کے دوران کیا۔انہوں نے کہاکہ ڈانگری راجوری میں پیش آئے واقعے کے بعد علاقے میں خوف و دہشت کو دور کرنے کے لئے پولیس کام کر رہی ہیں۔انہوں نے بتایا کہ حملہ آوروں کو تلاش کرنے کی خاطر حساس علاقوں میں اضافی نفری تعینات کی گئی جبکہ جمعے کے روز بھی متعدد علاقوں میں سرچ آپریشن لانچ کیا گیا۔اُن کے مطابق راجوری میں وی ڈی سی کو بھی مضبوط کیا جارہا ہے اور اُنہیں ہتھیار بھی دئے جارہے ہیں۔ایس ایس پی نے بتایا کہ ضلع راجوری میں سماج دشمن عناصر کے منصوبوں کو ناکام بنانے کی خاطر اقدامات اُٹھائے جارہے ہیں۔انہوں نے بتایا کہ اضافی پیر املٹری فورسز کی کمپنیوں کو حساس علاقوں میں تعینات کیا گیا۔اُن کے مطابق ضلع بھر میں پیٹرولنگ اور سرچ آپریشنز میں تیزی لائی گئی ۔
موصوف ایس ایس پی نے بتایا کہ حملہ آوروں کا پتہ دینے والوں کو پہلے ہی پولیس نے انعام سے نوازنے کا اعلان کیا۔انہوں نے کہاکہ راجوری کے متعدد علاقوں میں ملی ٹینٹ مخالف آپریشنز جاری ہیں اور ہمیں پورا یقین ہے کہ بہت جلد ملوثین کو انجام تک پہنچایا جائے گا۔
گرفتار مشکوک افراد کی تعداد کے بارے میں پوچھے گئے سوال کے جواب میں ایس ایس پی نے کہاکہ مشکوک افراد کو حراست میں لینے کا سلسلہ جاری ہے اور بہت جلد ملوثین کو بھی بے نقاب کیا جائے گا۔بتادیں کہ ڈانگری راجوری میں شہری ہلاکتوں کے بعد ضلع بھر میں سیکورٹی کے غیر معمولی انتظامات کئے گئے ہیں جبکہ حساس علاقوں میں اٹھارہ اضافی پیرا ملٹری فورسز کی کمپنیاں تعینات کی گئی ۔
