نئی دہلی، 29 اگست (یو این آئی) دہلی کے وزیر ماحولیات گوپال رائے نے کہا کہ دہلی حکومت نے فضائی آلودگی کو کم کرنے کے لیے کئی سخت اقدامات کیے ہیں جس کی وجہ سے اچھے، اطمینان بخش اور معتدل دنوں کی تعداد میں اضافہ ہوا ہے۔
ماحولیات اور موسم سرما کے ایکشن پلان کو بہتر بنانے کے لیے جمعرات کو مسٹر گوپال رائے کی صدارت میں "ماہرین کی میٹنگ” کا انعقاد کیا گیا جس میں ڈی پی سی سی، محکمہ ماحولیات، یو این ای پی، ای پی آئی سی انڈیا، کلین ایئر ایشیا، آئی آئی ٹی کانپور کے ساتھ تمام متعلقہ محکموں کے افسران اور نمائندوں نے شرکت کی۔
انہوں نے بتایا کہ ماہرین کی جانب سے دہلی کے اندر مصنوعی بارش کرنے کا مشورہ آیا ہے۔ اس تجویز پر ہم مرکزی وزیر ماحولیات کو خط لکھیں گے کہ وہ آئی آئی ٹی کانپور کے ماہرین اور تمام متعلقہ محکموں کے ساتھ میٹنگ کریں۔ انہوں نے کہا کہ چیف منسٹر اروند کیجریوال کی قیادت میں دہلی حکومت نے فضائی آلودگی کو کم کرنے کے لئے کئی سخت اقدامات کئے ہیں جس کی وجہ سے اچھے، اطمینان بخش اور معتدل دنوں کی تعداد میں اضافہ ہوا ہے۔ اچھے، تسلی بخش اور معتدل دنوں کی تعداد 2016 میں 110 تھی جو 2023 میں بڑھ کر 206 ہو گئی ہے۔
وزیر ماحولیات نے کہا کہ مختلف محکموں اور اداروں کے افسران اور نمائندوں کی تجاویز پر مزید موسم سرما کا ایکشن پلان تیار کیا جائے گا، حکومت فضائی آلودگی کو کم کرنے کے لیے طویل المدتی اور قلیل مدتی منصوبے بنا کر مسلسل کام کر رہی ہے۔ حکومت نے تمام متعلقہ محکموں کے ساتھ مل کر سمر ایکشن پلان اور ونٹر ایکشن پلان بنا کر آلودگی کو کم کرنے میں کامیابی حاصل کی ہے۔
