ستارہ (یو این آئی) نیشنلسٹ کانگریس پارٹی (این سی پی-ایس پی) کے سربراہ شرد پوار نے منگل کو مبینہ طور پر مہاتما گاندھی اور پنڈت جواہر لال نہرو کے نظریات کو بدنام کرنے کی کوشش کے لئے وزیر اعظم نریندر مودی اور ان کے حامیوں پر تنقید کی۔
این سی پی-ایس پی امیدوار ششی کانت شندے کی حمایت میں یہاں ایک انتخابی ریلی سے خطاب کرتے ہوئے مسٹر پوار نے گزشتہ 10 سالوں کے دوران ملک میں ضروری اشیاء کی قیمتوں میں اضافہ اور بے روزگاری کے لئے مرکزی حکومت کی غلط پالیسیوں کو ذمہ دار ٹھہرایا۔ انہوں نے الزام لگایا کہ کسان اپنی زرعی پیداوار کی مناسب قیمت نہ ملنے کی وجہ سے خودکشی کر رہے ہیں اور دعویٰ کیا کہ اس عرصے میں خواتین کے خلاف جرائم میں بھی اضافہ ہوا ہے۔
انہوں نے کہا کہ ستارہ انقلابیوں کا ضلع ہے۔ یہاں آنجہانی یشونت راؤ چوان اور وسنت دادا پاٹل نے ملک کو آزادی دلانے کے لیے تحریک آزادی میں حصہ لیا تھا۔ انہوں نے کہا کہ انہوں نے مہاتما گاندھی اور پنڈت جواہر لال نہرو کے نظریات کو فروغ دیا اور مسٹر مودی اور ان کے حامیوں پر الزام لگایا کہ وہ ان کے نظریات کو بدنام کرنے کی کوشش کر رہے ہیں۔ اس دوران سابق وزیر اعلیٰ اور کانگریس کے سینئر لیڈر پرتھوی راج چوان نے الزام لگایا کہ مسٹر مودی گزشتہ 10 سالوں میں نوجوانوں کو دو کروڑ نوکریاں دینے اور کسانوں کے بینک کھاتوں میں 15 لاکھ روپے جمع کرانے جیسے اپنے انتخابی وعدوں کو پورا کرنے میں ناکام رہے ہیں۔
انہوں نے دعویٰ کیا کہ آنے والے برسوں میں مودی کے بھاری قرضے لینے سے ملک کی معیشت تباہ ہو جائے گی۔ انہوں نے کہا کہ اب بی جے پی اور مسٹر مودی کو یہ الیکشن جیتنے کا یقین نہیں ہے۔
