دہلی میں غیر معمولی طوفان سے نظام زندگی متاثر

نئی دہلی: رات 10 بجے کے قریب اچانک تیز طوفان نے دہلی کا موسم مکمل طور پر بدل دیا۔ ہوا کی رفتار اتنی زیادہ تھی کہ میٹرو کے پہیے رک گئے۔ دہلی کے ساتھ ساتھ نوئیڈا میں بھی طوفان دیکھا گیا۔ تیز آندھی اور طوفان کے باعث بجلی کی فراہمی بھی متاثر ہوئی۔ تیز طوفان کا اثر مغربی دہلی میں سب سے زیادہ دیکھا گیا۔ طوفان کی شدت کا اندازہ اس بات سے لگایا جا سکتا ہے کہ طوفان کی رفتار اتنی تیز تھی کہ لوگوں کو لگا جیسے میٹرو بھی ہل گئی ہو۔ ٹرین کو شاستری پارک میٹرو اسٹیشن پر روک دیا گیا۔ بجلی بار بار فیل ہو رہی تھی۔ تب لوگوں کو اس بات کا احساس ہوا۔
طوفان اور گرج چمک کے دوران دوارکا موڑ کے علاقے میں ایک بڑا ‘سائن بورڈ’ گر گیا۔ اس کی زد میں آکر ایمبولینس سمیت دو گاڑیوں کو نقصان پہنچا۔ حکام کے مطابق رات 10.15 بجے یہ فوفان آیا۔خراب موسم کی وجہ سے جمعہ کی شام دیر گئے دہلی ہوائی اڈے پر اترنے والی نو پروازوں کی منزل تبدیل کر دی گئی۔ ایک افسر نے یہ اطلاع دی۔ اہلکار نے بتایا کہ جے پور کے ہوائی اڈے پر کچھ پروازیں بھیجی گئیں۔ شام دیر گئے دہلی کے کچھ حصوں میں طوفان آیا اور بارش ہوئی۔ گردو غبار کے طوفان کے پیش نظر محکمہ موسمیات نے لوگوں کو گھر کے اندر رہنے اور غیر ضروری سفر سے گریز کرنے کا مشورہ دیا ہے۔
موسم کی اچانک تبدیلی کے باعث سڑکوں پر ٹریفک کا نظام درہم برہم ہوگیا اور لوگوں کو شدید پریشانی کا سامنا کرنا پڑا۔ دہلی-این سی آر کے کئی مقامات پر گردو غبار کی وجہ سے نظام زندگی درہم برہم ہو گیا، تیز ہواؤں سے اڑنے والی دھول کی وجہ سے حد نگاہ بھی کم ہو گئی۔ موسم کی اچانک تبدیلی کے باعث سڑکوں پر ٹریفک کا نظام درہم برہم ہوگیا اور لوگوں کو شدید پریشانی کا سامنا کرنا پڑا۔ ہندوستان کے محکمہ موسمیات نے ٹویٹ کیا کہ پوری دہلی اور این سی آر کے آس پاس کے علاقوں (لونی دیہات، ہندن اے ایف اسٹیشن، غازی آباد، اندرا پورم، چھپرولا، نوئیڈا، دادری، گریٹر نوئیڈا، گروگرام، فرید آباد) میں گردو غبار اور طوفان کا امکان ہے۔ ان علاقوں میں 50-70 کلومیٹر فی گھنٹہ کی رفتار سے تیز ہوائیں چلیں گی، دہلی، نوئیڈا، فرید آباد اور غازی آباد کے کئی علاقوں میں ہوا میں دھول اور کچرا اڑنے لگا۔ اس کی وجہ سے بہت سے لوگوں کو آنکھوں میں جلن محسوس ہوئی اور دیکھنے میں پریشانی کا سامنا کرنا پڑا۔ قابل ذکر ہے کہ حال ہی میں دہلی میں اس سال کا سب سے گرم دن ریکارڈ کیا گیا تھا، لیکن جمعہ کو چلنے والی ہوا نے پریشانی کو مزید بڑھا دیا۔ تاہم ہوا چلنے سے موسم میں ہلکی سی تبدیلی آئی اور گرمی کا احساس کم ہوگیا۔ کئی لوگوں کو گردوغبار سے بچنے کے لیے محفوظ مقامات پر پناہ لینا پڑی۔ کئی علاقوں میں درختوں کے گرنے کے مناظر بھی دیکھے گئے ہیں، جب کہ دہلی ایئرپورٹ کے ذرائع کے مطابق طوفان کے باعث دہلی آنے والے ایئر انڈیا کے دو طیاروں کو جے پور کی طرف موڑ دیا گیا۔