اے ایم یوکے مختلف کورسیز میں داخلہ کیلئے1.5 لاکھ سے زیادہ درخواستیں موصول

علی گڑھ: عید الفطر کے تہوار کے بعد علی گڑھ مسلم یونیورسٹی (اے ایم یو) داخلہ ٹیسٹ اور سمسٹر امتحانات کے لیے پوری طرح سے تیار ہے۔ مئی کے مہینے میں امتحانات شروع ہوجائیں گے اور ان کے خوش اسلوبی سے انعقاد کی تیاریاں زوروں پر ہیں۔یونیورسٹی میں مختلف کورسز میں داخلے کے لیے 1.5 لاکھ سے زائد امیدواروںنے درخواستیں دی ہیں ۔ یہ تعداد گزشتہ تین برسوں میں سب سے زیادہ ہے۔داخلہ امتحانات اے ایم یو علی گڑھ سمیت دیگر شہروں جیسے لکھنؤ، سری نگر، پٹنہ، کولکاتہ، کوزی کوڈ وغیرہ میں ہوں گے۔ یونیورسٹی نے داخلہ امتحانات کے لیے وسیع پیمانے پر انتظامات کیے ہیں۔ اساتذہ کو ملک کے مختلف داخلہ امتحان مراکز کے لئے بطور آبزرور تعینات کیا جائے گا۔
دوسری طرف یونیورسٹی 29 اپریل سے انڈرگریجویٹ اور پوسٹ گریجویٹ کورسز کے 2022-23 سیشن کے سمسٹر امتحانات بھی منعقد کرے گی۔یونیورسٹی ترجمان نے بتایا کہ کووڈ 19 وبا کے بعد اور تقریباً دو تعلیمی برسوں کے وقفے کے بعد سمسٹر امتحانات شیڈول کے مطابق منعقد کئے جا رہے ہیں۔ یہ طلباء کے تعلیمی مفادات کے تحفظ اور نتائج کے بروقت اعلان کے لیے اہم ہے۔ امتحانات کے شیڈول کو ویب سائٹ پر اپ لوڈ کر دیا گیا ہے۔اے ایم یو نے تعلیمی سیشن 2022-23 سے چار سالہ انڈرگریجویٹ پروگرام کو اپنایا ہے اور اس بیچ کے پہلے سمسٹر کے امتحانات کامیابی سے منعقد کیے جاچکے ہیں ، جب کہ دوسرے سمسٹر کے امتحانات جلد منعقد کیے جائیں گے۔
کووڈ-19 کے پیش نظر یونیورسٹی طلباء کے مفاد میں سبھی مثبت اقدامات کر رہی ہے۔ عوامی مقامات پر باقاعدگی کے ساتھ فاگنگ کرائی جارہی ہے اور بیداری مہم بھی چلائی جارہی ہے ۔ اس کے ساتھ ہی طلباء کو کووڈ کے پیش نظر تمام احتیاطی اقدامات اور طرز عمل اپنانے کی ترغیب دی جا رہی ہے۔
وائس چانسلر پروفیسر محمد گلریز نے مختلف امتحانات کے خوش اسلوبی سے انعقاد کے لیے اساتذہ و طلباء اور عملہ کے اراکین سے تعاون کی امید کی ہے۔