چنئی (یو این آئی) تمل ناڈو کے وزیر اعلی ایم کے اسٹالن ریاست میں سرمایہ کاروں کو راغب کرنے کے لیے منگل کی رات امریکہ روانہ ہوں گے۔
مسٹر اسٹالن 17 دن کے لیے امریکہ کا دورہ کریں گے اور 12 ستمبر کو واپس آنے کی امید ہے۔مسٹر اسٹالن امریکہ میں سرمایہ کاروں، صنعت کاروں اور تاجروں سے ملاقات کریں گے اور ان سے تمل ناڈو میں سرمایہ کاری کے مسائل پر بات کریں گے۔ ان کے دورے کے دوران کئی مفاہمت ناموں پر دستخط بھی متوقع ہیں۔
وہ سان فرانسسکو سے شروعات کریں گے اور 2030 تک تمل ناڈو کو ایک ٹریلین امریکی ڈالر کی معیشت بنانے کا ہدف حاصل کرنے کے واسطے سرمایہ کاروں سے ملاقات کے لیے شکاگو کا بھی دورہ کریں گے۔ توقع ہے کہ وہ امریکہ میں موجود تمل باشندوں سے بھی ملاقات اور بات چیت کریں گے۔
ریاستی صنعت کے وزیر ٹی آر بی راجہ پہلے ہی امریکہ پہنچ چکے ہیں اور ممکنہ سرمایہ کاروں اور صنعت کے رہنماؤں کے ساتھ ابتدائی ملاقاتیں کی ہیں۔ مئی 2021 میں پہلی بار چیف منسٹر کا عہدہ سنبھالنے کے بعد مسٹر اسٹالن کا یہ تیسرا غیر ملکی دورہ ہوگا۔ اس سے قبل وہ متحدہ عرب امارات، اسپین، سنگاپور اور دیگر ممالک کا دورہ کر چکے ہیں اور سرمایہ کاروں کے ساتھ معاہدوں پر دستخط کر چکے ہیں۔ پچھلے تین سالوں میں ریاست نے 09 لاکھ 74,000 کروڑ روپے کی سرمایہ کاری کو راغب کیا ہے، جس سے 31 لاکھ لوگوں کے لیے براہ راست اور بالواسطہ روزگار پیدا ہوا ہے۔
مسٹر اسٹالن نے کچھ عرصہ پہلے ٹی این انویسٹمنٹ کانکلیو کا افتتاح کیا تھا، جس میں انہوں نے 17,616 کروڑ روپے کے 19 پروجیکٹوں کا آغاز کیا۔ اس سے 64,968 افراد کو روزگار ملے گا۔ اور 51,157 کروڑ روپے کے 28 دیگر پروجیکٹوں کا سنگ بنیاد رکھا جس سے 41,835 لوگوں کو روزگار ملے گا۔ مذکورہ بالا سے متعلق زیادہ تر مفاہمت ناموں پر اس سال جنوری میں منعقدہ گلوبل انوسٹرس سمٹ (GIM) کے دوران دستخط کیے گئے تھے۔ جی آئی ایم میں 6.64 لاکھ کروڑ روپے کی سرمایہ کاری کے لیے کل 631 مفاہمت ناموں پر دستخط کیے گئے ہیں، جس کے ذریعے 14 لاکھ لوگوں کو براہ راست اور 12 لاکھ لوگوں کو بالواسطہ روزگار ملے گا۔
امریکہ کے دورے سے پہلے، مسٹر اسٹالن نے اپنے کابینہ کے ساتھیوں، پارٹی کے سینئر لیڈروں، اراکین پارلیمنٹ اور ارکان اسمبلی کے ساتھ مرینا بیچ فرنٹ پر سابق وزرائے اعلیٰ ایم کروناندھی اور سی این انا دورائی کی سمادھی پر خراج عقیدت پیش کیا۔
