نیویارک: آئی سی سی ٹی 20 ورلڈ کپ 2024ء میں ہندوستان نے پاکستان کو سنسنی خیز مقابلے کے بعد 6 رنز سےہرا دیا۔ ہندوستان کے 120 رنز کے ہدف کے تعاقب میں پاکستان 7 وکٹ کے تقصان پر 113 رنز ہی بنا سکا۔محمد رضوان 31 اور عماد وسیم 15 رنز بناکر آوٹ ہوئے ، بابراعظم، فخر زمان اور عثمان خان نے 13 ، 13 رنز بنائے جبکہ افتخار احمد 5 اور شاداب خان 4 رنز بناسکے۔نسیم شاہ 10 رنز کے ساتھ ناٹ آؤٹ رہے۔
نیویارک کے نساؤ کاؤنٹی اسٹیڈیم میں ہندوستان اورپاکستان کا ہائی وولٹیج میچ بارش کے باعث کچھ دیر رکنے کے بعد دوبارہ شروع ہوا، تو ہندوستانی بیٹرز نے اننگز کا جارحانہ انداز میں آغاز کیا اور کپتان روہت شرما نے شاہین شاہ آفریدی کے پہلے اوور میں ہی گیند باؤنڈری لائن کے باہر پھینکتے ہوئے 8 رنز بنالیے۔
وراٹ کوہلی کے آؤٹ ہونے کے بعد ہندوستانی بیٹنگ لائن تھوڑا لڑکھڑاگئی ، کوہلی 4 رنز بناکر نسیم شاہ کی گیند پر 12 کے مجموعے پر کیچ آؤٹ ہوئے، ہندوستان کی دوسری وکٹ 19 کے اسکور پر کپتان روہت شرما کی گری، جو شاہین شاہ آفریدی کی گیند پر ایک چوکے اور ایک چھکے کی مدد سے 13 رنز بنا کر حارث رؤف کے ہاتھوں کیچ آؤٹ ہوئے۔
تیسری وکٹ کا نقصان ہندوستان کو اکشر پٹیل کی صورت میں اٹھانا پڑا، جو 58 کے اسکور پر 2 چوکے اور ایک چھکے کی مدد سے 18 گیندوں پر 20 رنز بناکر آؤٹ ہوئے، چوتھے آؤٹ ہونے والے کھلاڑی سوریا کمار یادو تھے جو 89 کے مجموعے پر حارث رؤف کی گیند پر 7 رنز بنا کر کیچ آؤٹ ہوئے۔ نیویارک کے نساؤ کاؤنٹی اسٹیڈیم میں گروپ اے کے اس میچ میں پاکستان نے ٹاس جیت کر بھارت کو پہلے بیٹنگ کرنے کی دعوت دی۔
