بی جے پی نے 39 امیدواروں پر مشتمل دوسری فہرست جاری کی
بھوپال (یو این آئی/ایجنسیاں) مدھیہ پردیش میں اقتدار برقرار رکھنے کی بھرپور کوشش کر رہی بھارتیہ جنتا پارٹی نے آج رات 39 امیدواروں کی دوسری فہرست جاری کی، جس میں کئی حیران کن نام بھی سامنے آئے ہیں۔خبروں کے مطابق اس لسٹ میں تین مرکزی وزراء کے ساتھ ہی کل 7ارکان پارلیمنٹ کو اسمبلی الیکشن لڑانے کا فیصلہ کیا گیا ہے۔ان وزراء کے نام نریندر سنگھ تومر، پرہلاد پٹیل اور فگگن سنگھ کلستی بتائے گئے ہیں۔اس کے علاوہ چار ارکان پارلیمان کو بھی پارٹی نے امیدوار بنایا ہے۔اس فہرست میں مرکزی وزیر زراعت نریندر سنگھ تومر کو مورینا ضلع کے دیمنی اسمبلی حلقہ سے امیدوار بنایا گیا ہے۔ ریاستی الیکشن مینجمنٹ کمیٹی کے کنوینر، مسٹر تومر فی الحال مورینا پارلیمانی حلقے کی نمائندگی کرتے ہیں۔ اس کے علاوہ ایک اور مرکزی وزیر پرہلاد پٹیل کو نرسنگھ پور سے ٹکٹ دیا گیا ہے۔ مسٹر پٹیل دموہ پارلیمانی حلقے کی نمائندگی کرتے ہیں۔ ایک اور مرکزی وزیر اور منڈلا کے ایم پی فگن سنگھ کلستے کو درج فہرست قبائل کے لیے مخصوص نشست سے ٹکٹ دیا گیا ہے۔
اندور اسمبلی حلقہ سے بی جے پی کے قومی جنرل سکریٹری کیلاش وجے ورگیہ کو میدان میں اتارنے کا فیصلہ کیا گیا ہے۔ اس کے علاوہ جبل پور مغربی اسمبلی حلقہ سے سابق ریاستی صدر راکیش سنگھ، ستنا سے گنیش سنگھ، سدھی سے محترمہ ریتی پاٹھک اور گڈرواڑا سے راؤ ادے پرتاپ سنگھ کو امیدوار بنایا گیا ہے۔ یہ چاروں امیدوار اس وقت بالترتیب جبل پور، ستنا، سدھی اور ہوشنگ آباد حلقوں سے ایم پی ہیں۔
کچھ عرصہ قبل بی جے پی نے 39 امیدواروں کی پہلی فہرست جاری کی تھی جس میں کئی نئے چہروں پر اعتماد ظاہر کیا گیا تھا۔ گزشتہ اسمبلی انتخابات میں ان تمام 39 سیٹوں پر بی جے پی کو شکست کا سامنا کرنا پڑا تھا۔ اسی طرح آج اعلان کردہ 39 سیٹوں میں سے بیشتر پر بی جے پی کو 2018 کے پچھلے انتخابات میں شکست کا مزہ چکھنا پڑا تھا۔
ریاست کی تمام 230 سیٹوں کے لیے اسمبلی انتخابات نومبر-دسمبر کے مہینے میں ہونے کا امکان ہے۔ موجودہ بی جے پی حکومت کے بارے میں مبینہ اینٹی انکمبنسی فیکٹر کی وجہ سے پارٹی امیدواروں کی دوسری فہرست کو بہت اہم سمجھا جا رہا ہے۔
بی جے پی کی مرکزی قیادت کی طرف سے آج جاری کردہ ریلیز کے مطابق 13 ستمبر کو ہونے والی مرکزی الیکشن کمیٹی کے اجلاس میں منظوری کے بعد 39 نشستوں کے لیے امیدواروں کی دوسری فہرست جاری کی گئی ہے۔
فہرست کے مطابق شیوپور سے درگلال وجے، مورینا سے رگھوراج کنسانا، لہار سے امریش شرما گڈو، بھتروار سے موہن سنگھ راٹھور، ڈبرا (ایس سی) سے محترمہ امرتی دیوی، سیودھا سے پردیپ اگروال، کریرا (ایس سی) سے رمیش کھٹک، راگھو گڑھ سے ہیریندر سنگھ بنٹی بانا، دیوری سے برج بہاری پٹیریا اور راج نگر سے اروند پٹیریا کو امیدوار قرار دیا گیا ہے۔
میہر سے شری کانت چترویدی، سنہاوال سے وشوامتر پاٹھک، کوتما سے دلیپ جیسوال، ڈنڈوری (ایس ٹی) سے پنکج ٹیکم، کٹنگی سے گورو پاردھی اور جنار دیو (ایس ٹی) سے ناتھن شاہ کو میدان میں اتارنے کا فیصلہ کیا گیا ہے۔
